Gaalkacayo (Sahan Post):- Waxaa aas balaadhan loogu sameeyey Qabuuraha Magaalada Gaalkacayo Allah Ha u Naxariistee Saabiriin Saylaan Cabdulle o 12/11 lagu dilay magaalada Gaalkacayo ee Gobolka Mudug.
Aaska Saabiriin ayaa waxaa ka qaybgalay Madaxda iyo Saraakiisha Ugu saraysa Gobolka Mudug, Ehelada Saabiriin, Culumaa´udiin, Dumar iyo Rag aad u tiro badan, si ay u muujiyaan murugada iyo saamaynta ay ku reebtay Gaalkacayo dilka 14 jir agoonta iyo rajada ahayd ee ku baxday gacanta Hodon Muxumed Diiriye, 34 jir ay sida la sheegay u shaqayn jirtay.
Hodon Muuse ayaa 24/11 lagu xukumay dil, kaasi oo ah qisaastii Saabiriin Saylaan, Halka Cabdcasiis Xaashi ay Hodon udhaxdayna lagu xukumay 1 sanno oo xadhiga iyo 500 dooladh. Maxkamada Derejada Kowaad ee Gaalkacayo masoo bandhigin eedaysanayaal kale marka laga reebo lamaanaha la xukumay.
Dhacdadan ayaa aad looga dareemay geyiga Soomaalidu degto iyo Daafaha Caalamka, iyadoo dhacdoyinka noocan ahi ay kusoo badanayaan dhulka Soomaaliyada, waxay ahayd 31/10 markii gabadh 8 jir ah la kufsaday dabadeedna si aad ah loo jidh-dilay Degmada Xingalool ee Gobolka Sanaag, tanoo aan weli cadaalad helin. Isla laba usubuuc ka qiyaasii 12/10 ayaa hooyo iyo saddex gabdhood oo ay dhashay lagu dilay deegaanka Qaayib ee Gobolka Galguduud.
10/11 ayaa Daa´uud Maxamed Isxaaq oo ahaa nin dhimirka looga jiro lagu gubay tuulo hoostimaada magaalada Wanla-Weyn ee Gobolka Shabeelada Hoose, taasi oo dabasocotay Aano beeleedyo galaafatay 13 qof oo uu kamid ahaa qoys ka kooban aabe hooyo iyo ilmo saddex jir ah oo dhaleen, isla 24 saac kadibna dilkii Daa´uud waxaa dab la qabadsiiyey tuulo ay deganaayeen dad shacab ah iyadoo looga aargudayo gubistii Daa´uud Maxamed Isxaaq.
Dhacdooyinka noocan ayaa u baahan ka hortag, ka dabatag iyo in bulshada laga wacyi geliyo jariimooyinka iyo tacadiyada galaafanay boqolaal nafood oo aan waxba galabsan.
Sahan Post
info@sahanposts.com
Discover more from SahanPost, Mapping The Nomad Minds
Subscribe to get the latest posts sent to your email.