Garoowe (Sahan Post):- Shir Jaraai´id oo uu Qabtay Wasiirka Warfaafinta Puntland Maxamuud Caydiid Dirir ayuu si kulul uga Weeraray Dawlada Federaalka Soomaaliya, isagoo ku eedeey xidhiidh Al-Shabaab ay la leedahay, Caydii oo ka jawaabayey hadallo kasoo yeeray masuuliyiin ka tirsan Dowladda Federaalka.
Kuwaas oo uu ku tilmaamay kuwo dhaawacaya amniga iyo wadajirka bulshada Soomaaliyeed. Wasiirku wuxuu si gaar ah u tilmaamay hadalkii shalay ka baxay Wasiiru-dowlaha Gaashaandhigga DFS, kaasoo sheegay in “hubka loo oggol yahay oo keliya laba dhinac: Dowladda iyo Alshabaab.”
Dirir ayaa sheegay in hadalkaasi uu sii xumeynayo kalsoonida shacabka, isla markaana u muuqdo mid sharciyeynaya cadowga dalka, halka shacabka iyo maamullada kale lagu wiiqayo. Wuxuu sheegay in Puntland aysan marnaba aqbali karin in Alshabaab loo fududeeyo sharci ama sharaf siyaasadeed.
Sidoo kale, Wasiirku wuxuu ka falceliyey hadalkii Madaxweynaha Soomaaliya, Xasan Sheekh Maxamuud, ee ahaa in Alshabaab ay qaadan karaan kaarka NIRA, taas oo uu ku tilmaamay baaq halis ku ah amniga shacabka Soomaaliyeed. Waxa uu sheegay in Puntland u aragto Alshabaab cadow cad, halka hadallada noocan ahi ay khatar ku yihiin la-dagaalanka kooxaha xagjirka ah.
Maxamuud Caydiid Dirir ayaa caddeeyey in Puntland aysan oggolaan doonin in deegaannadeeda lagu arko qof wata dukumenti sharciyeyn kara Alshabaab, isagoo sheegay in “qof kasta oo lagu arko kaarka NIRA uu yahay Alshabaab lana qaban doono,” taasoo muujinaysa mowqif adag oo Puntland ka qaadatay arrintan.
Dawlada Federaalka Ayaan weli ka jawaabin eedaymaha uu wasiirka Warfaafinta Puntland u jeediyey, iyadoo xidhiidka Dawlada Dhexe iyo Maamul Goboleedku Sii xumaanayo.
Sahan Post
info@sahanpost.com
Discover more from SahanPost, Mapping The Nomad Minds
Subscribe to get the latest posts sent to your email.