AFRICOM iyo Madaxda Puntland Maka Wada Hadleen Dilkii Caaqil Cumar Cabdullahi

Badhan (Sahan Post): Saraakiisa iyo Madaxda AFRICOM ayaa markii saddexaad booqanaysa Puntland mudo ka yar 3 billood, iyagoo labadii kulan ee u danbeeyey la kulmay madaxweyne Siciid Cabdullahi Denni halka ay maanta ay madaarka Boosaaso kula kulmeen Madaxweyne Ku Xigeenka Puntland Ilyaan Lugatoor. Booqashooyinkan isdaba jooga oo aan faah-faahin dheeriya laga bixin ayaa waxay kusoo aadayaan iyadoo diyaaradaha Maraykanu Ay duqeyn dhanka Cirka ah Ku dileen Nabadoon Cumar Cabdullahi Cabdi Ibraahim, Deegaanka Jiicanyo ee u dhexeysa magaalooyinka Badhan iyo Ceelbuh 13 kii bishii 9aad 2025.

Haddaba Madaxweyn Siciid Cabdullahi Deni oo dabayaaqadii Sebtember la kulmay Suldaan Siciid iyo Ehelka Nabadoonka ayaa la wadaagey in uusan wax xog ah ka haynin dilka Nabadoon Cumar Cabdullahi balse usheegay in uu AFRICOM iyo Maraykanka ka dalbaday cadayn dheeriya, Denni ayaa odayaasha iyo ehelka Nabadoonkaas u balanqaaday inuu la wadaagi doono xog dhamaystiran. Isagoo dhankiisa Cadeeyey in Puntland aysan wax lug ah ku lahayn dilkaasi, isla markaasina Nabadoonkaas aan wax eed iyo denbi tooni ahi ka oolin Gudaha Puntland.

Hadaba iyadoo ay iminka Markii saddexaad Imanayso AFRICOM Gudaha Puntland oo sida warar ku sheegayaana ay ka warqabto in duqeynta ay gaysteen uu ku geeriyoodey Nin Nabadoon Caan ka ahaa Gudaha Puntland iyo Soomaaliya. Weli wax war ah iyo xog toona madaxda Puntland lama aysan wadaagin ehelka iyo bulshadii uu ka geeriyoodey Nabadoon Cumar Cabdullahi Cabdi Ibraahim.

Puntland sidoo kale weli wax qoraal ah, tacsi, ama baadhitaanadii laga sameeye goobta duqeynta lama aysan wadaagin ehelka Nabadoonka iyo dadweynaha toona. Hadaba Maxay ka ogtahay Puntland dilka Nabadoon Cumar Cabdullahi, xog intee le´eg ayayse AFRICOM la wadaagtey madaxweynaha Puntland iyo Saraakiishiisa amniga oo ka la tuhunsan yahay inay kawarqabeen weerarka lagu duqeeyey Nabadoonka. Muxuuse madaxweynah Puntland Saddex bilood ka dib ula wadaagi la´yahay ehelka iyo dadka reer Puntland duqeynta lagu beegsaday Nabadoonkaasi.

Ehelka iyo Bulshada Nabadoonka ayaa cadaalad dalbanaya. Wasiirka Gaashaandhiga Federaalka Axmed Macalin Fiqi ayaa eeda dilka Nabadoonka Dusha usaaray maamulka Puntland isagoo sheegey in hawlgalada laga fuliyo maamul goboleedyada ay xogta iyo masuuliyadeeda leeyihiin maamul goboleedka laga dhulkiisa laga fuliyey hawlgalka. Iyadoo Puntland ay ka jawaabtey eedaymaha Fiqi balse ay ka gaabsatay dilka nabadoonka, taasi oo shaki ka muujinaysa waxa ay Puntland ka ogtahay dilka Nabadoonka.

Kulanka Maanta ka qabsoomay magaalada Boosaaso ee AFRICOM iyo Madaxda Puntland oo ay fadhiyeen dhamaan Saraakiisa hogaanka amniga iyo hawlgalada, si khaas ah na ula shaqeeya AFRICOM kama aysan soosaarin wax war oo khuseeya duqeynta lagu dilay Nabadoon Cumar Cabdullahi Cabdi Ibraahim.

Suldaan Siciid Cabdusalaan oo ah masuulka ugu sareeya Gobolka Sanaag oo aad ugu dhowaa Nabadoon Cumar Cabdullahi, wax war lagama hayo kadib booqashadii iyo balanqaadkii madaxweyne Denni ee arinta Dilka.

Sidoo kale Feysal Ahmed Maxamed Wahaabi oo ah wakiil heer Federaal oo lagasoo Doorto Sanaag oo ay aad isugu dhowaayeen Nabadoonka la diley weli wax war ah haba yaraatee lagama hayo. Sidaasi si lamid ah dhamaan masuuliyiinta iyo siyaasiyiinta Sanaag iyo Haylaan ee heer Wasiir, Xildhibaano Puntland iyo Federaalkuba aad bay uga gaabsadeen dilka Nabadoonkaas.

Sahan Post.

info@sahanpost.