Wasiir Puntland ah oo Ku Eedeeyey Dawlada Federaalka Inay Talada Dalka Ku Wareejiso Al-Shabaab iyo Hubanti La´aanta Mustaqbalka Soomaaliya.

Garoowe (Sahan Post):- Iyadoo mudooyinkii u danbeeyey khilaafka u dhexeeya Dawlada Federaalka Soomaaliya (DFS) iyo Maamul Goboleedka Puntland, ayaa Wasiirka Wasaarada Caddaaladda Puntland Maxamed Cabdiwahaab oo warbaahinta kula hadlay Magaalada Garoowe ku eedeey DFS inay dalka ugacan gelin doonto Alshabaab, Maxamed ayaa sheegay in DFS ay xilal sarsare ka hayaan rag katirsan Al-shabab oo aan weli ka soo laaban mawqifkoodii hore, isagoo sheegay in la qorshaynayo in talada dalka lagu wareejiyo kooxdaasi.

“Layaab maleh maanta inaan maqlayno Alshabaab ayaa hubkii loo ogolaaday, kaararkii aqoonsiga ayaa Alshabaab qaadanaysa oo madaxweynihii ugu yeerayo, waxaas oo dhammi la yaab maleh waayo dowladdii dhammayd wasiiradii, Agaasimayaashii, ciidankii iyo meel walba rag Alshabaab ah ayaa madax ka ah meel qaybtood meel ay kaga bexeen ma jirto”, Ayuu yiri Wasiir Maxamed Cabdiwahaab.

Dhanka kalena, Wasiir Maxamed Cabdiwahaab ayaa ku eedeeyey Madaxweyne Xasan Sheekh Maxamuud iyo dowladdiisu inay diyaarinayaan qorshihii talada dalka loogu wareejin lahaa kooxda Alshabaab.

“Waxaa muuqata Madaxweyne Xasan Sheekh inay diyaarinayaan qaabkii talada dalka Alshabaab loogu wareejin lahaa wax qarsoonna ma ahan, waddamo ayaana dabada ka riixaya sidii Syria lagu tijaabiyey, kaararka ay dadka ku khasbayaan waa in berri doorasho been ah la qabto oo dalka Alshabaab gacanta loogeliyo”, Ayuu yiri Markale Wasiirku.

Eedaymahan oo ah eedaymo aad culus, ayaa abuuraya sii kala fogaansho labada dhinac ah, iyadoo DFS aanay weli ka jawaabin eedan iyo mid ka horeysay ee uu Wasiirka Warfaafinta Puntland ku Eedeeyey DFS inay naasnuujinayso Al-Shabaab, tani waxay kusoo beegmaysaa iyadoo si aan laga fiirsan uu Wasiiru Dawlaha Wasaarada Gaashaandhigu Sheegay in “Huba loo ogol yahay labo kooxood uun keliya Dawlada Federaalka iyo Alshabaab“ siduu hadalka u dhigay mar uu warbaahinta kula hadlayey Muqdisho. Madaxweyne Xassan ayaa isna sheegay in Alshabaab ay qaadan karto ID qaranka ee Hay´ada NIRA ay bixiso.

Ma cada musqaqbalka Siyaasada Soomaaliya iyadoo hore loo arkay isbedelka ku dhacay Wadamada Afqaanistaa iyo Suuriya oo dhanka maamulka ay la wareegeen kooxo diimeedyo kasoo horjeedey maamuladii dalalkaasi ka talinayey.

Sahan Post

info@sahanpost.com