New York (Sahan Post):- Midowga Afrika (MA) iyo Qaramada Midoobay (QM) ayaa dib u xaqiijiyay iskaashigooda istiraatiijiga ah ee ku aaddan nabadda, amniga iyo horumar waara, intii lagu jiray shirkii sagaalaad ee sanadlaha ahaa ee MA–QM oo lagu qabtay xarunta Qaramada Midoobay ee magaalada New York.
Shirkan waxaa si wadajir ah u guddoomiyey Guddoomiyaha Guddiga Midowga Afrika, Mudane Mahmoud Ali Youssouf, iyo Xoghayaha Guud ee Qaramada Midoobay, Mudane António Guterres.
Labada hoggaamiye waxay hoosta ka xarriiqeen muhiimadda wada-shaqeynta MA iyo QM ee xoojinta xasilloonida caalamka, iyagoo muujiyay walaac xooggan oo ku saabsan colaadaha hubeysan, dhibaatooyinka bani’aadannimo iyo xadgudubyada sharciga caalamiga ah. Waxay carabka ku adkeeyeen baahida loo qabo xalal siyaasadeed oo lagu gaaro wadahadal iyo dhexdhexaadin.
Shirku wuxuu dib u eegay dadaallada wadajirka ah ee lagu taageerayo geeddi-socodka nabadeed ee ay hoggaaminayaan Afrikaanku, gaar ahaan dalalka Suudaan, Koonfurta Suudaan, Soomaaliya, Liibiya, Gobolka Harooyinka Waaweyn iyo Geedska Afrika.
Waxaa sidoo kale lagu adkeeyay baahida loo qabo maalgelin joogto ah oo lagu taageerayo hawlgallada nabad ilaalinta ee Midowga Afrika, sida uu dhigayo Qaraarka Golaha Ammaanka ee QM 2719 (2023).
Shirku wuxuu sidoo kale iftiimiyay iskaashi sii kordhaya oo ku saabsan is-beddelka dijitaalka, falalka isbedelka cimilada, iyo horumarinta ka mid noqoshada bulshada, iyadoo la tixraacayo Istaraatiijiyadda Isbeddelka Dijitaalka ee Afrika, Hindisaha G20 ee AI for Africa, iyo natiijooyinka Shirkii Labaad ee Cimilada Afrika.
Youssouf iyo Guterres waxay ku bogaadiyeen Midowga Afrika ansixinta Heshiiska Ciribtirka Tacaddiyada ka Dhanka ah Haweenka iyo Gabdhaha, iyagoo xusay kaalinta muhiimka ah ee haweenka iyo dhallinyarada ee nabadda iyo horumarka waara.
Midowga Afrika iyo Qaramada Midoobay ayaa ku heshiiyeen in Shirkii Tobnaad ee Sanadlaha ah lagu qabto Addis Ababa, Itoobiya, sannadka 2026, si loo sii xoojiyo iskaashigooda istiraatiijiga ah ee dan u ah Afrika iyo dunida inteeda kale.
info@sahanpost.com
Discover more from SahanPost, Mapping The Nomad Minds
Subscribe to get the latest posts sent to your email.