Muqdisho (Sahan Post):- Magaalada Muqdisho oo uu ayaamihii ugu danbeeyey kusugnaa. Madaxweynihii hore ee dowladda federaalka Soomaaliya Maxamed Cabdullaahi Farmaajo oo xalay kulan la qaatay xubno ka tirsan labada aqal ee baarlamaanka iyo Siyaasiyiin kale ayaa sheegay in dalku ku jiro xaalad aad u cakiran.
Farmaajo mar uu ka hadlayay duruufaha abaaraha, gaajada iyo sicir bararka dalka ka jira, wuxuu sheegay in dalka ay ka jirto xaalad adag oo mid la mid ah macaluushii dhacday 1992-dii (Caga Barar), islamarkaana ay jiraan dad maalin dhaaf wax u cuna, sida uu hadalka u dhigay.
Sidoo kale Madaxweyne hore Farmaajo oo ka hadlay go’aanka dowladda federaalka Soomaaliya ay kula soo wareegtay dhul dowladdu leedahay ayaa tilmaamay in tallaabadaasi ahayd mid khaldan, isagoo ku baaqay in la joojiyo arrintaas.
Maxamed Cabdullaahi Farmaajo oo ka hadlay arrimaha doorashada waxa uu xusay in dowladda ay u hartay lix bilood, lagana rabo qaabka doorashada iyo xilliga la qabanayo.
Dhanka ka kale Madaxweyne Xassan Shiikh oo ka hadlayey shirka Garsoorka Soomaaliya ayaa isagoo u duurxulaya ugu baaqay siyaasiyiinta iyo musharixiinta Muqdisho ku sugan in ay soo dhaafaan Hoteelada iyo Guryaha ay ku nool yihiin oo bulshada soo dhexgalaan, iyadoo loo qaatay inuu u dan lahaa Farmaajo.
Sahan Post
info@sahanpost.com
Discover more from SahanPost, Mapping The Nomad Minds
Subscribe to get the latest posts sent to your email.