Muqdisho (Sahan Post):- Ra’iisul Wasaaraha XJFS Xamsa Cabdi Barre ayaa hoygiisa ku qaabilay, kulan casho ahna kula qaatay qaar ka mid ah Isimada Puntland oo booqasho ku joogay caasimadda dalka, kuwaasi oo casumaad ka helay Dawlada Federaalka-
Ra’iisul Wasaaraha ayaa si diiran usoo dhoweeyay Isimadda oo kala ahaa Beeldaaje Maxamed Beeldaaje Ismaaciil, Beeldaaje Ismaaciil Beeldaaje Yaasiin, Suldaan Mursal, iyo Suldaan Maxamuud Xaaji Cabdullaahi, iyo marti kale.
Kulanka oo goobjoog ka ahaayeen xubno labada gole ayaa waxaa looga hadlay baahiyaha deegaanka iyo xoojinta wada shaqeynta shacabka iyo dowladdooda si loo gaaro xasilooni iyo horumar.
Intii uu kulanku socday, waxaa si qoto dheer la’isaga xog-waraystay xaaladda guud ee dalka, gaar ahaan deegaannada ay ka yimaadeen Isimadu, iyo dadaallada ay ku bixinayaan xoojinta dowlad-dhiska iyo dib-u-heshiisiinta bulshada Soomaaliyeed.
Ra’iisul Wasaare Xamse ayaa yiri “Waxaan uga mahadceliyey Isimada doorka muuqda ee ay ka qaateen dhismaha dowladnimada Soomaaliya, xallinta khilaafaadka beelaha, iyo mideynta bulshada, waxaan ku dhiirrigeliyey in ay sii laba jibbaaraan kaalintooda muhiimka ah ee ku aaddan adkaynta midnimada, nabadda, iyo horumarinta dowlad-dhiska”.
Dadka odorosa isbedbedelka siyaasada Soomaaliya ayaa aaminsan in kulankan ay dabada ka riixayaan siyaasiyiin heer Federaal ah oo kasoo seeda Puntland balse aan ku qanacsanayn siyaasada Madaxweynaha Puntland Said Abdullahi Deni.
Dawlad Goboleedka Puntland oo aan xidhiidh fiican la lahayn Dawada Federaalka ayaan wax wax ah kasoo saarin kulamadan, iyadoo xildhibaano siyaasadeed ay walaac ka muujiyeen arinkan. Hase ahaatee dawlada dhexe ayaa isku dayaysa inay xidhiidh wanaagsan oo soo jiidasho leh la yeelato bulshada goboladaasi. Isimadan ayaa hore ula kulmay madaxweyne Xassan Sheikh Maxamuud.
Sahan News Desk
info@sahanpost.com
Discover more from SahanPost, Mapping The Nomad Minds
Subscribe to get the latest posts sent to your email.